فجر البرادعي قنبلته الخاصة - مِن نِفسه - في شكل بيان أدلى به للشعب المصري و لكن حين فرغنا من قراءة البيان النووي تساءلنا هل هذا بيان للترشيح أم للإعتذار عن الترشيح ؟ : البرادعي يقول في بيانه - بإختصار - أن
موقفه من الترشح للرئاسة سيتحدد على ضوء كيفية التعامل مع عدة أمور سياسية
أولاً - إنتخابات نزيهة ، مراقبة دولية عبر مراقبين دوليين ، إشراف قضائي كامل ، تنقية الجداول الإنتخابية و إتاحة مساحات متساوية لجميع المرشحين في مختلف وسائل الإعلام
ثانياً - إذا ما قرر أن يرشح نفسه بناءاً على رغبات المنتخِبون يجب أن يتم تعديل الدستور لأن الفترة الحالية تتطلب مرشحاً توافقياً مستقلاً - أي بدون حزب - و بدون شرط الإنتساب للجنة أحد الأحزاب العليا لفترة عام كامل
ثالثاً - دولة مدنية ، متقدمة ، ديموقراطية ، حقوق إنسان ، تعديل الدستور .. إلخ إلخ من الكلام الحلو اللي ها يقوله أي مرشح حتى لو كان من المحظورة إخوان .. لكن طبعاً لو كان على الكلام كنا بقينا أجدع أمه في أم الكرة الأرضية ، العبرة بالتطبيق
---
سامحني إن كنت ضعيفاً في مادة السياسة ، لكني لا أفهم بيان البرادعي
ثم أن في حاجة محدش واخد باله منها ... هو البرادعي قال شوية شروط زي العسل المفروض أنها تتحقق علشان يرشح نفسه .. كلام جميل .. طيب لو ما حصلش ؟
مش ها ترشح نفسك .. و يبقى كفى الله البرادعي شر القتال !؟
سؤال : أنت مؤمن بالشروط الإصلاحية دي و لا لأ ؟
لو مؤمن .. يبقى تعمل اللي ربنا يقدرك عليه علشان تخليها تتحقق ، طيب و هو في وقت أفضل من الوقت الحالي - و كل الناس بتحبك - لأنك تشتغل و تعرق شوية علشان تحاول تحقق أهدافك ... حتى لو معرفتش .. برضه حاول .. و لا أنت خايف من الهزيمة ؟
يا أخي ده شعار أولمبياد المعاقين : ( دعني أفوز فإن لم أستطع دعني أكون شجاعاً في المحاولة ) ... خليك شجاع
إن كنت تريد أن ترشح نفسك - حتى لو مستقلاً - فلتعمل على تحقيق هدفك
تعال إلى مصر ، أطلع الشارع و أعمل مظاهرات سلمية عَسكَر قدام مبنى البرطمان و أرفع يافطة و قول أطالب بتعديل الدستور و السماح للمستقلين بالترشح للرئاسة
بلاش تنضم لحزب .. أعمل حركة / جمعية .. أي مهلبية و طالب بهدفك
قف قدام الحكومة و قدام جماهيرك مش وراهم ، قودهم أنت و ماتسيبهمش هما يفرشولك السجادة الحمرا و ينفضولك الكرسي علشان تيجي أنت تقعد عليه
بس الأهم خليك واضح .. أنت ها ترشح نفسك و لا لأ
لو لأ .. يبقى نفضها سيرة و كل واحد يروح بيتهم و لا يشوفله حد تاني يرشحه
لو آه ... يبقى أشتغل .. أسعى في الموضوع و حاول تتغلب على المشاكل اللي في طريقك و أحنا ها نبقى معاك ، بس عايزين كتفك يبقى في كتفنا
-----
Musica : Rammstein & Tatu - Half An Hour Without You
---
