متهيألي كلنا متفقين أن الثورة فشلت ، على الأقل لم تنجح ، و الأخوة المتفائلين قوي بيقولوا عليها انها لسة مستمرة ، و انا بكتب التدوينة دي و انا في كامل قواي التفائلية علشان محدش يتهمني بالإكتئاب و السوداوية ، في الحقيقة انا لا متفائل و لا متشائم انا الأتنين في بعض ، زي ما قال عمنا إيميل حبيبي .. انا "متشائل" : و المتشائلين مش هما الواقعيين لأن الأخرانيين دول معندهمش لا تفائل و لا تشائم ، لكن المتشائلين عندهم الأتنين في نفس الوقت .. خلاصة الكلام الإنشا ده ان رأيي محايد و موضوعي لكنه غير واقعي و لا يعوَّل عليه .
شفت شوية سياح أجانب النهاردة الصبح في ميدان التحرير بياخدوا صور للميدان ، لاحظت ان مفيش زاوية في الميدان ممكن يطلع منها صورة جميلة ، أو حتى مقبولة ، يظهر قبل ما آجي جمال الميدان لملم توبه و اتمطع و دخل ينام تحت خيمة من خيام المعتصمين و ساب السياح الاجانب و النمش اللي على خدودهم لوحدهم بيلفوا حوالين نفسهم كانهم تايهين و عدسات كاميراتهم بتبربش تحت المطر ، و على ناصية الجنينة اللي بعد المتحف المصري فيه ركن ريحته لا تحتمل ، مر من عليه اتنين سياح عرب و ضحكم و هما بيغطوا مناخيرهم بايديهم ، مكانش صعب انك تتخيل هما بيقولوا ايه .
" عارف يعني ايه تبات في الميدان ، يعني كس ام الجرين كارد على أمريكا على أوروبا على أي حتة في العالم ، طول عمري مبضون من الدنيا ، امبارح بس حسيت انه ممكن " ، و لما سألته : " ممكن أيه ؟ " .. قال لي .. " كل حاجة " .
في الحقيقة احنا اتضحك علينا .. اتضحك علينا جامد قوي يعني
و غالبا فشلنا ده ها يتم تدريسه في المستقبل كنموذج للثورة العبيطة اللي بتسيب جهاز المخابرات ، و أمن الدولة و الشرطة و الإعلام الموجه و أخطبوط الفساد الإداري في كل أركان الدولة زي ما هو بدون تطهير أو محاكمة علشان يرجع يخنقنا
كان لازم نكتب على باب ثورتنا " ممنوع دخول رجال الدين " علشان دول نشالين ثورات
احنا اتضحك علينا بتحية عسكرية على التليفزيون بفقرة اخبار البورصة و عجلة الأنتاج .. أبقى خلي العجلة تنفعك يا ابن العبيطة
الثوري الساذج على وزن " الهولندي الطائر " ، و " اليهودي التائه " الهولندي الطائر ربان سفينة أشباح ملعونة تجوب البحار إلى الأبد من دون أن تعود إلى مرساها و اليهودي التائه ملعون آخر كتب عليه ان يهيم في الارض عقابا على ضرب المسيح و الثوري الساذج يموت على اعتاب وزارة الداخلية و يفشل في تنظيم إضراب عام أو إنجاح قوائم الثورة مستمرة
- على فكرة سوزان مبارك ها تبيع مذكراتها لصالح دار نشر بريطانية مقابل أكتر من 100 مليون جنيه ، المذكرات اللي بتكشف فيها ان الابن المفضل لحسني هو علاء مش جمال .. يا حلاوة
في الوقت اللي الاخوان توصلوا فيه لخطة عبقرية للعبور من الازمة الاقتصادية و هي انهم يلموا فلوس من الشعب .. نهار اسود لو كانت دي هي خطة " النهضة " اللي عاملها الاخوان لمصر .. نحمل التبرعات لمصر
- الأخوان المسلمين و حكومة الجنزورى يستشيرون اللص الهارب رشيد محمد رشيد من أجل النهوض بالاقتصاد - تفكير ممتاز
- في كارثة تهجير الاسر المسيحية من العامرية أكدت لجنة حقوق الإنسان أنها ستستبدل كلمة التهجير الواردة فى محضر الصلح بكلمة التفريق منعاً لتصاعد المشكلة وحقناً للدماء، التفريق و لا التعريص يا لجنة ؟
و على فكرة موضوع التهجير مش بس العامرية ده حصل لأسرة في مطاي بالمنيا بمباركة مدير الأمن ومن شهرين في أسيوط عائلة كاملة بالأعمام والأقارب و غيرهم كتير .. بس تفريق مش تهجير برضه
