: في الماتش الأولاني .. كان المُعلق سعودي .. و كل ماتيجي الكاميرا علي جرانت .. يقول بعصبية
" المدرب الصهيوني ... لا يشرفني أن أذكر إسمك "
! و الكلام الكبير ده ... و فعلاً لم يذكر أسمه .. علي إعتبار أن هو كده أصبح غير موجود
أنا قلت مش مشكلة .. الراجل عايز يبين للناس أنه عربي أصيل و مناضل من الصنف الممتاز
في الماتش التاني ... كان المُعلق مصري .. سمج طبعاً .. لأن واضح أن ده شرط أساسي لقبول المعلقين حالياً
: المهم .. برضه كان عمال يقول
المدرب الصهيوني جرانت ... اللي جابه الملياردير الصهيوني إبراموفيتش "
" و باين في ملامحك الخبث يا جرانت زي بقية بني جنسك
إلي آخره من الكلام الكبير .. اللي بوظ علي الفرجة علي الماتش , مش لأني بحب جرانت , لكن لأنه ساب الماتش و مسك في جرانت و كان ناقص يقول قصيدة هجاء في المدرب الإسرائيلي
أنا قلت في بالي
طب طالما أنت كارهه جداً قوي خالص بالشكل ده .. قبلت تعلق علي الماتش ليه من الأساس ؟
و لا أقول لك .. عندي فكرة أجمد
أنزل يا عم من كابينة المعلقين و روح أقتله و ريحنا و ريح نفسك
طبعاً أمنياتي دي مستحيل أنها تتحقق
ليه بقي ؟
علشان هو .. زي ناس كتيرة تانية .. محترف النضال الحنجوري
يعني يناضل بالكلام .. تحت شعار .. أهو كلام يا عبد السلام
و في الغالب .. أغلب الحنجوريين دول في النهاية بيكسبوا من ورا النضال ده
! يعني الكابتن المعلق ده قابض فلوس علشان يناضل تخيل
( و النضال ده حتي أحسن بكتير من النضال ال ( فري رايد
يعني النضال .. أبو بلاش
... علشان ده نضال أبو بفلوس .. فلوس مكسب للمناضل طبعاً
( القضية الفلسطينية - بصراحة - أتهرت ( فري رايد
كل من هب و دب .. أخد القضية الفلسطينية لفة بالبسكلتة .. و رجعها تاني زي ما أخدها
زايد و شجب و أدان ... ودانه أحمرت .. و صوته أتنبح ... و في الآخر روح بيتهم و أتغطي و نام
------------------------------------
شعارات و كلام و فري رايد للصبح ... ها نصلح الفساد و ها نصلح المجتمع و ها نصلح مصر
ها نعمر سينا ... و ها نزرع قمح
بنحب مصر ... و بنموت فيها .. لكن مش بنشتري المصري
مقدرش أنكر أن الحكومة هي المسئولة عن كتير من المشاريع دي
لكن برضه ما أقدرش أنكر أن المواطن المصري العادي ليه دخل كبير فيها هو كمان
----
من يومين كنت عايز أشتري جهاز كمبيوتر محمول .. دورت و لقيت محل أسمه يونيفرسال
دخلت سألت .. لقيت الكمبيوتر سعره جميل جداً بالنسبة للأسعار التانية
سألت هو ده صيني ؟ قال لي البائع .. لا ده مصري .. فرحت جداً
صحيح بعد كده عرفت أنه فيه مكونات كورية .. بس كفاية أن المنتج النهائي عليه علامة مصرية
شيء مشرف
قعدت مع البياع نتكلم .. الراجل كان مليان أحزان
! المبيعات قليلة جداً .. الناس بتفضل تشتري الصيني علي المصري
مع أن المصري معاه ضمان ثلاثة سنين .. مش سنة واحدة
و سعره مساوي لسعر الصيني ... أو حتي أقل
كله خايف من المصري ... طب أمال فين شعارات بنحب مصر ؟
لو بتحب مصر صحيح ... مش تشتري المصري ؟
و لا هي فري رايد ... و خدلك لفة ع البسكلتة ؟
--------------
