لازم تعرف يا علي أن محسوبك عنده الكفاءة أنه يعمل أي حاجة يحطها في نافوخه .. بس انا أخترت راحة البال يا علي .. زي ما مصر إختارت شيبسي بالجمبري كده يا علي ... أنت فاهمني يا علي ؟
انا من جيل السد يا علي ، يعني قلنا ها نبني و آدي إحنا بنينا .. صحيح إتخزوقنا بعدين لكن بنينا السد يا علي ، محدش يقدر ينكر ده ، انت بقى يا علي من جيل توشكى و أبقى قابلني لو أكلت منها زيتونة واحدة يا علي .. هاجر يا علي و سيب أم البلد دي قبل ما أولادك يبقوا من جيل الضبعة يا علي
بلدك مليانة كراسي يا علي .. من كرسي الغفير لكرسي الوزير لكرسي الجنرال و كل كرسي فيهم هو كرسي العرش .. و لما تحب تنسب الكرسي لأسم النبي حارسه اللي قاعد عليه ، تقدر تسميه : كرسي العرص
و النكتة يا علي أن أول ما أسم النبي حارسه يرفع طيزه من فوق الكرسي ( لأسباب خارجة عن إرادته طبعا ً .. و هي أنه مات ) تظهر مذكرات رحلة حياة طيزه و تطبعها الدولة في كتاب بعنوان : شاهد على العرص .. و يدرسوها للتلاميذ بتوع خامسة ابتدائي
الصحرا جايه يا علي .. و طعم الرملة على لساني
طعم الرملة في كوباية الشاي يا علي .. و في حجر المعسل
بحاول أفتكر يا علي طعم الحاجات قبل ما تتخلط بالرملة
و مش عارف
صحرا - الشاب خالد
