حاجة مش صحية أبداً أنك تعمل كبسة على عينيك تلاقيها بتدمع ، دموع نازلة لحالها . ماشيه على خدودك من غير رخصة أو تصريح خروج صادر من عقلك مشفوع بأسباب محددة واضحة لحالة الحزن .. عارف ان حزني زي لون الضوء الأبيض ، تفتكر في الأول انه خواء ، في أحشاه فراغ لكنه شايل جواه كل الألوان ، و انا مش معايا هرم زجاجي ( منشور ) علشان أشوف أحزاني مبدورة في الهوا بلون الطيف و لا عندي الحماس أرش على جروحي زيت و أفرد على سطحها همومي بالنشابة الخشب زي عجينة البيتزا ، قلبي موجوع كأني في جنازة أعز أصحابي و بفكر أنو منطقي جداً يكون اللون الأبيض هو لون ملابس الحداد في بعض الثقافات البوذية و الأفريقية ، منطقي و عميق لدرجة تغيظ
---
Pink Floyd - Great Gig in The Sky
