شريط فيديو

by على باب الله Thursday, July 22, 2010 16 تعليقات Vous n'avez pas dit au revoir mon ami

بمنطق الأفلام الهندي الغير منطقي إطلاقاً ، إكتشفت أن النهارده بالتحديد أتم هذا البلوج اللعين 3 سنين بالظبط . و إكتشفت ده لما كنت بشوف أول بوست كتبته على المدونة ، العجيبة أن عيد ميلادي هو كمان النهاردة ( 22 يوليو ) اليوم اللي بينتهي فيه برج السرطان و يبدأ برج الأسد ، يعني انا بقالي 3 سنين مش واخد بالي أني فتحت المدونة يوم عيد ميلادي

سعيد بتجربة التدوين عموماً .. و أجمل ما فيها اني إتعرفت عن طريقها بشكل شخصي ( بني آدم لبني آدم ، مش مجرد شاشة كمبيوتر لشاشة كمبيوتر ) على مجموعة من أجمل الأصحاب اللي عرفتهم في حياتي .. على فكرة انا محتاج أقولهم أني بحبهم قوي

سعيد لأن المدونة مش مشهورة .. سعيد لأن المدونة شبه عربية الفول بتاعة عم أحمد اللي عارف زباينه نفر نفر .. مش شبه ستاربكس اللي غالباً بيكون مليان بالناس و برضه بتحس فيه بالغربة

سعيد لأني قدرت أستمر في ممارسة واحدة - مُجدية كانت أو غير مُجدية - 3 سنين كاملين بإستمرارية و مثابرة أدهشتني ، مع أني من رواد فن صناعة الأشياء غير المكتملة

سعيد حتى و انا عارف أن زمن المدونات قرب ينتهي - ده إن مكانش إنتهى فعلاً - و إحنا دلوقتي في العصر الفيسبوكي .. سعيد حتى و انا عارف أن المدونات ها تبقى عاملة زي شريط الفيديو اللي بدأ رحلة الإنقراض أول ما قالوا يا كمبيوتر ، و بفكر جدياً أني أستمر و بدماغي الوسخة أسيب نادي الفيديو بتاعي مفتوح لأطول وقت ممكن لغاية لما يقرر آخر جهاز فيديو في البلد أنه يبطل يعرض أفلام 

---
i Believe in Miracles : Hot Chocolate

هوامش : الصورة من ألبوم عماد ماهر