حمدين صباحي

by Sunday, May 20, 2012 0 تعليقات

تعالى نتفق الأول أن فيه خمس مرشحين للرئاسة مش هيخرج منهم الرئيس القادم و هما : أبو الفتوح ، محمد مرسي ، عمرو موسى ، حمدين صباحي و أحمد شفيق .. متهيألي محدش معترض على الفرضية دي .. و من الخمسة دول مطلوب مني كمواطن مصري أني أختار أفضلهم بالنسبالي 

تعالى الأول نقول أني كمواطن مصري عندي إختيارين .. المقاطعة ( مقاطعة الإنتخابات ) أو المشاركة فيها .. المقاطعة فعل إعتراضي . .يعني أنا معترض على أنو الإنتخابات تتم في ظل سلطة المجلس العسكري .. و معترض أن الإنتخابات تتم في ظل فراغ دستوري و البلد راكبة الهوا .. و معترض لأني بشكك في نزاهة الإنتخابات و متوقع أنها مش هتكون نزيهة .. متهيألي دول التلات إعتراضات الرئيسية اللي عليها ممكن يقرر الواحد أنه يقاطع الإنتخابات 
لكن المشكلة أن المقاطعون معندهمش تصور موحد لطريقة الحل .. يعني مفيش مجلس رئاسي جاهز لأنه يستلم السلطة من المجلس العسكري بل أنه حتى المرشحين الثوريين زي أبو العز الحريري و هشام البسطويسي و خالد علي و أبو الفتوح و حمدين فشلوا في توحيد صفوفهم ورا مرشح واحد و البرادعي غالبا لو جيت تسلمله السلطة هيرفضها أصلا .. إذن مفيش غير أنك تسلم السلطة للمجلس الوحيد المنتخب اللي هو مجلس الشعب .. دي فكرة مش لذيذة خالص 
الفكرة أنك لو عاوز تعمل دستور الأول - و هو رأي صحيح بالمناسبة - ها تضطر تعمله تحت سلطة المجلس العسكري برضك و إن كانت وجهة النظر السديدة الوحيدة في الليلة دي ممكن تكون أنك ها تنجو من اللطة بتاعتك لو أنتخب الشعب رئيس إخواني يتحد مع المجلس الإخواني و يجيبلك دستور حسن البنا 
تعالوا كمان نتفق أن المقاطعة علشان تكون مُجدية لابد لها من كتلة حرجة من المقاطعين تخلخل النظام محل المقاطعة .. و إلا تبقى مجرد رأي شخصي لا وزن له في تغيير الواقع .. و هو بالظبط اللي حصل لمن قرروا مقاطعة إنتخابات البرلمان 
لو مقتنع أن المقاطعة هترضي ضميرك قاطع طبعا .. بس خليك عارف أن الواقع لن يتغير بمقاطعتك فقط

طيب ده بالنسبة لو قررت تقاطع .. أما لو قررت تشارك في الإنتخابات الرئاسية فقدامك فرضيتين برضك الأولى أنك تختار مرشح يمثلك و تروح تنتخبه بغض النظر عن أي حاجة - و ده صح جدا على فكرة - و انا شخصيا كنت مقرر أني أعمل كده مع بثينة كامل لو كانت عرفت تجيب العدد المطلوب من التوكيلات 
الفرضية التانيه أنك تشوف مين المرشحين اللي عندهم حظوظ أكتر من غيرهم للفوز و تفاضل بينهم لتستقر على أقرب واحد للي أنت عايزه و تختاره . و ده اللي انا  قررت أعمله مع الخمس مرشحين اللي ذكرتهم في أول التدوينة . و ده مش بدعة و النعمة .. ده اللي بيعمله أغلب الناخبين على الكوكب ، فرنسا مثلا مش نصها إشتراكيين لكنهم شافوا أن أولاند أقربلهم من ساركوزي فإنتخبوه  و الراجل مكدبش خبر و شكلهم حكومة لوز العنب يا ريت يبقى عندنا ربعها 


متقوليش بص على البرامج الإنتخابية .. ممكن ألخصلك البرامج بتاعة المرشحين كلهم ( حتى البرنامج بتاع الفريق حسام خير الله - إن وجد ) في كلمتين : "سنعمل لكم البحر طحينة " .. و كل عام و أنتم بخير .. ثم أنهم لو مقتنعين ببرامجهم فعلا ممكن يقدموها كلها للرئيس الفائز للمفاضلة بينهم و أختيار البند الأصلح في كل برنامج 




محمد مرسي
مش حابب أنتخب رئيس ينتمي لنفس حزب الأغلبية في البرلمان علشان أنا كده أبقى بعمل حزب وطني عن طريق الميكانو ، و مش حابب أنتخب حد " مدعوم و مُختار من الله " زي ما وصفته أمينة المرأة بحزب الحرية و العدالة    وخطيب مسجد القائد إبراهيم( الشيخ أحمد المحلاوي ) اللي قال : لستم مخيرين في الانتخاب.. أشهد الله أنكم مطالبون شرعًا بدعم مرسي   و لا هنتخب حد بيقولك مشروع النهضة هو مشروع النبي محمد
عايز أنتخب حد لا هو نبي و لا رسول .. بني آدم طبيعي يعني . وعايز أنتقده لما يغلط و ما أبقاش بنتقد إرادة الله و لا يقولوا عليا الشيطان الرجيم عدو الدين
و مش عايز أنتخب حد أترشح صدفة أو أستبن لحد تاني و الأتنين أراجوزات لجماعة يرأسها حد تالت 
ده غير أني أصلا ضد جماعة الإخوان و خلطها للسياسة بالدين 
و مش عايز أنتخب حد بيقولك قال الله و قال الرسول و هو بيحط سبعتاشر إخوانجي و إخوانجية قدام كل لجنة إنتخابية يلقن الناخبين الغلابة و هما داخلين يصوتوا " الميزان يا حج .. الميزان يا حجة " في فترة المفروض أنها فترة صمت إنتخابي 





عبد المنعم أبو الفتوح 

بص .. أنا الزمان علمني أن اللي يصاحب كل الناس يبقى مش صاحب حد خالص 
ياسر برهامي بيقول:"أبو الفتوح وعدنا بالتطبيق الكامل للشريعة الإسلامية - " لكن أبو الفتوح بيقول الشريعة مطبقة في الدستور الحالي .. طب أيه يعني أنت مين فيهم ؟؟
أبو الفتوح بيقدم نفسه على أنه الإسلام الوسطي .. لكنه هيتبنى وسطية البنا !! الله مش البنا اللي قال لك المرأة تطلع الشغل حرام و الأحزاب السياسية حرام ؟؟ أنت مين فيهم ؟
أبو الفتوح بيرقص على الحبل .. بيظفلط من بين أيديك زي الصابونة .. هل هو وسطي فعلا و لا بيقول اللي أنت عايز تسمعه تحت شعار " أنتخبوني و ابقوا قابلوني " .. الحقيقة أنا مش عارف 
هل تبرأ من ماضيه فعلا .. مش عارف !!  هو مقدمش دليل على كده غير شوية كلام .. أبن عم حديت يعني  و لكني سأضطر لإنتخابه لو دخل في الإعادة مع مرسي أو موسى أو شفيق


حمدين صباحي 
صباحي مش كامل الأوصاف .. عنده غلطات بس عنده كمان أساسيات هو مؤمن بيها ممكن يتبني عليها أولها أنه مؤمن بقوة الشعب و إرادته و مؤمن جدا بالعدالة الإجتماعية و مؤمن بالفن ( الراجل طلع في دور صغير في فيلم الآخر ) و حرية الإبداع و مؤمن بالمواطنة : ما بيصنفش المصريين ( كفار و مؤمنين ) و بيوعد أنه هيفعل قانون منع التمييز بين المصريين 
الراجل - على عيوبه - مش جاي  على الكرسي بدعم من جماعة معينة هيبوس أيد مرشدها اللي جابله الكرسي و لا هو شخص ملاوع .. زي الزيبق بيغير مواقفه قبل ما يترشح إرضاءا لجميع الأذواق و لا بيقول على نفسه إسلام وسطي لأن المصريين المفروض كلهم إسلام وسطي مش جديدة يعني .. حد عنده فرصة معقولة للفوز مؤمن بمدنية الدولة و حقوق المواطنة و العدل و مش مدعوم من أي جهة هيكون ذليل ليها .. حد ممكن تصلح عيوبه بمناقشة متطلعش منها كافر و زنديق علشان كده انا هدي صوتي لحمدين صباحي و أنا واعي تماما بعيوبه بس شايف أنه كان دايما متسق مع ذاته و مبادءه  و إنحيازه فقط لمصر


أما عن بقية المرشحين فماليش نفس أتكلم عليهم .. ده غير أن التدوينة فخدت مني قوي و كفاية كده بقى

OF Monsters And Men - Little Talks

على باب الله

Developer

Cras justo odio, dapibus ac facilisis in, egestas eget quam. Curabitur blandit tempus porttitor. Vivamus sagittis lacus vel augue laoreet rutrum faucibus dolor auctor.