شفت من كام يوم كده علي قناة فضائية غريبة شيخ قاعد في فسحاية و قاعد جنبه مقدم برامج محترم جداً جداً و المفروض أنهم بيستقبلوا تليفونات و إيميلات علي البرنامج عبارة عن أسئلة من الجمهور و الشيخ بيفتي في الحكاية
عادي يعني ... بنشوف الحوار ده كتير
المهم جه سؤال جميل جداً عن طريق الإيميل ( أخدت بالك أنه جاي عن طريق الإيميل ) المهم .. السؤال بيقول
" ما هي أحكام قضاء الحاجة في الخلاء ؟ "
طبعاً أنا تخيلت أن الشيخ ها يزعل و يتقمص .. و يقول أيه العبط ده ؟ أنت جاي تتريق يا روح أمك ؟
لكن الغريبة أن الشيخ أخد السؤال بشكل جد جداً .. و جاوب إجابة شافية وافية .. قعد ربع ساعة بحالها يجاوب .. تخيل .. الراجل متبحر جداً لدرجة أنه ممكن يؤلف كتاب عن الموضوع .. لكن الإجابة للأسف ما سمعتش منها حاجة لأني كنت بضحك
بضحك علي خيبتي طبعاً .. لأني كنت جاهل بأمور حيوية و هامة زي دي .. و كنت فاكر الموضوع سهل يعني مش محتاج فتاوي , إقلع سلبوتة .. جعمس علي الأرض .. و ربنا يسهل لك .. و بعد كده أستزوق يعني و أردم نتاج التساهيل دي بشوية تراب .. و كل عام و أنتم بخير
لكن يبدو أن حتي العملية البسيطة دي كانت محتاجة فتوي آخد بيها الأوكيه من اللي حاطين دماغي في الدراي كلين و شغالين غسيل فيها لحد ما بقت أنضف من الصيني بعد غسيله .. و هو غاية المراد من رب العباد
--------------
عم الشيخ الملياردير عمرو خالد ... قال محاضرة عظيمة عن حب رسول الله , شيء جميل فعلاً
لكنه في النهاية قال : يعني حاجات بسيطة جداً ممكن نعملها و نبين بيها حبنا لرسول الله زي مثلاً أننا ندخل الحمام برجلنا الشمال و نطلع منه برجلنا اليمين .. أشياء بسيطة جداً يا جماعة .. و مش متعبة
الدراي كلين شغال الله ينور ... و العقول طالعة أنضف من الصيني
-------------
كانت مفاجأة كبيرة جداً للعبد لله لما أكتشفت أن دعاء الدخول إلي الحمام لا يحتوي علي الدعاء الأهم في هذا الموقف ... و هو
" يا مُسهل "
--------------
( كلاكيت تاني مرة )
المنطقة الغربية / السعودية
بدأ العمل في المشروع السكني الكبير ... شيدت المباني و دخلت بعضها في مرحلة التشطيبات النهائية
ثم توقف العمل فجأة ... دارت التساؤلات متعجبة .... ماذا حدث ؟
قالوا ... أصدرت الدولة أوامرها بوقف العمل بالمشروع
0لقد زار الموقع عدد من رجال الدين .. و بحثوا .. و محصوا .. و استكشفوا
" ثم قالوا.. " المراحيض تتجه كلها إلي إتجاه الْقِبْلَةِ في مكة
و توقف العمل
------------------
أما الهوبة الكبيرة فهو سؤال قريته علي موقع كبير علي النت .. و السؤال المعجزة كان
" هل يجوز البول قائماً ؟"
يعني لمؤخذة يعني .. الأخ بيسأل .. ممكن يتبول و هو واقف ؟
الغريبة هي أن الإجابة كانت طويلة ... أيوالله كانت طويلة .. و كانت فيما يشبه الجدال
يعني شوية أدلة بيقولوا أن ممكن و أنت قاعد .. و شوية بيقولوا ممكن و أنت واقف
و العبد لله لا يجد تعليق علي هذا الكلام ... إلا أنه شامم ريحة وحشة
---------------
