سيد مكاوي ... خلي شوية علي و خلي شوية عليك

by Thursday, October 04, 2007 11 تعليقات

سيد مكاوي



سيد مكاوي .. أنا شخصياً بحبه جداً
و بحبه أكثر كمطرب عنه كملحن
لأني مش عارف ليه بحس أنه في أغانيه بيكون هو المستمتع نمرة واحد
و المستمع نمرة واحد ... و بحس أنه بيغني الأغنية لنفسه مش للناس
و مش مهم عنده تعجبك الأغنية و لا ما تعجبكش , المهم أنها عاجباه هو و متسلطن بيها
و بشوف أن هو ده الأصل في الغناء .. إمتاع الذات
و مش في الغناء بس لكن في كل أنواع الفنون
سيد مكاوي واحد من المطربين اللي لازم تتفرج عليهم و أنت بتسمعهم
حالة الطرب و السلطنة اللي بيكون فيها لما بيغني بتتنقل ليك علطول
و بيضيع نص جمال الأغنية لما تسمعها في الراديو من غير ما تشوف حالة البهجة اللي بيكون سيد مكاوي غرقان فيها و هو بيغني

و بحبه كمان لأنه إنسان مرح , بشوش , مش ممكن تتخيله في ذهنك إلا و هو مبتسم

و لو حاولت أنك تتخيله و هو عابس الوجه أو زعلان .. مش ها تعرف

كان - الله يرحمه - مصري أصيل , إبن نكتة , سريع البديهة , و دمه خفيف

و مين فينا ما يحبش النوع ده من البشر ؟

و دلوقتي بقي أسيبك مع أغنية جميلة قوي في لحنها و كلامها و معانيها
الأغنية أسمها ( خلي شوية عليك ) و تقدر تنزلها أو تسمعها من هنا
هي و غيرها كتير من أغنيات سيد مكاوي

خلي شوية علي و خلي شوية عليك


وحياتك يا حبيبى ريح قلبى معاك
غلب الحب معايا وتعب الشوق وياك
ماتفتنيش انا وحدى أفضل أحايل فيك
ما تخليش الدنيا تلعب بيا وبيك
خلى شوية عليا وخلى شوية عليك



عمر هوانا بيجرى شوف راح منه كام
ساعة شوق ومحبة وشهر بعاد وخصام
ويبقى الحب تايه مش عارف احنا فين
زى المركب ما تبقى محتارة بين شطين
لكن لامتى يا عيونى انت
نبقى حبايب ومش حبايب لحد امتى



برجع تانى واقول لك ريحنى الله يخليك
عشان المركب تقدر تمشى بيا وبيك
وماتفتنيش انا وحدى افضل احايل فيك
ما تخليش الدنيا تلعب بيا وبيك
خلى شوية عليا وخلى شوية عليك



الليل بدموعه آسى وياويلى من ساعاتى
والصبر لسا ساكت وياويلى من سكاتى
توعدنى بفرحتى واستنى بضحكتى
زى الوردة ما تبقى مستنية الندى
وتغيب وتفتكر وتجينى وتعتذر
فين القلب اللى يقدر يستحمل كل دا



برجع تانى واقول لك ريحنى الله يخليك
عشان المركب تقدر تمشى بيا وبيك
ما تفتنيش انا وحدى افضل احايل فيك
ما تخليش الدنيا تلعب بيا وبيك
خلى شوية عليا وخلى شوية عليك

-----------

على باب الله

Developer

Cras justo odio, dapibus ac facilisis in, egestas eget quam. Curabitur blandit tempus porttitor. Vivamus sagittis lacus vel augue laoreet rutrum faucibus dolor auctor.