هو الحمار هو اللي بيجر العربية و لا العربية هي اللي بتجر الحمار ؟
عارف أن أنا في عيب كبير ... و هو أن عندي قدرة كبيرة علي التخيل
بتخيل حاجات كتير منها حاجات غير ممكنة و البعض منها ممكن
مثلاً خد عندك آخر تخيلاتي ... قاعد في أمان الله قمت فجأة تخيلت أني بهائي
أيوة ... تخيلت أني مصري بهائي
معلش بقي جاريني في لعبتي .. و تخيل معايا
قلت في عقلي .. فلنفرض أني كنت بهائي .. لسبب ما أقتنعت بالديانة البهائية و آمنت بيها
ممكن تقول لي من حقك .. تكفر تؤمن .. أنت حر
بهائي بوذي .. لا ديني .. أنت حر
لا إكراه في الدين
لكن ها أقول لك .. لأ يا سيدي أنا مش حر
ها تسألني أزاي يعني ؟
ها أقول لك .. لو أنا حر .. يبقي من حقي أعيش
و لو كنت بهائي مش ها أقدر أعيش في مصر
ها تقول لي : إزاي يعني مش فاهمك ؟
ها أقول لك .. أصلي لو كنت بهائي و لا بوذي مكنتش ها أعرف أعمل بطاقة شخصية
ليه ؟
علشان القانون المصري لا يعترف إلا بثلاثة أديان فقط
اليهودية و المسيحية و الإسلام
و لازم يكتب واحدة منهم في بطاقتك الشخصية و أوراقك الرسمية
طيب و بقية الأديان ؟
مالهومش وجود بالنسبة للمشرع المصري
ليه ؟
علشان الأديان الثلاثة دول هما الأديان السماوية
و كأن البوذي ده مثلاً ... عارف أن بوذا ده راجل هجاص و الدين بتاعه ده دين أي كلام
و البوذية دي ( تيكيلام .. تيكيلام ) .. لكنه مقضيها إستعباط
طب ما هو بكل تأكيد البوذي و الهندوسي مؤمن أنه دينه دين حقيقي
المهم ... ما علينا
طيب .. يرجع مرجوعنا من تاني للعبد لله .. اللي هو حالياً بيعيش في أرض الخيال كبهائي
عايش .. آه ... حر .. لأ
ليه ؟
لأني مواطن من غير هوية ... يعني بالبلدي .. مش مواطن
ها تقول لي أيه هوية دي ؟
ها أقول لك يعني بطاقة .. اللي بيسموها بطاقة تحقيق الشخصية
من غير بطاقة شخصية .. مش ها أعرف أتجوز , و لا أتعلم .. و لا أشتغل .. و لا أطلع رخصة سواقة
و لا ها أعرف أطلع باسبور .. و لا ها يبقي لي تأمين صحي .. و لا خدمة عسكرية
يا راجل ده أنا حتي لو حبيت أعمل كارنيه نادي .. و لا مركز شباب .. مش ها أعرف
و علي رأي الإعلان المشهور بتاع التكييف .. ده أنا حتي ما كنتش ها أعرف أعمل البلوج ده , لأن إشتراك الإنترنت محتاج صورة بطاقة
من الآخر ها أبقي مواطن .. رسمياً .. ماليش وجود
طيب أيه الحل ؟
أكتب في البطاقة ( كده و كده يعني ) و أغمزلك بعيني الشمال ... أني مسلم أو مسيحي أو حتي يهودي
المهم أستخرج بطاقة أكتب فيها أي حاجة علشان أعرف أسلك نفسي بيها
و تبقي دي بطاقتي اللي ( كده و كده ) و أغمز لك بعيني الشمال
لكن الحقيقة أني بهائي
ده غير أنه ( من آن لآخر ..... و من آخر لآن ) ها يطلعلي واحد مخنوق مني
أو فاكر نفسه صلاح الدين الأيوبي و فاكرني جيش الصليبيين
و يلدعني بلاغ في قسم الشرطة .. و يبهدلوني هناك
يعني .. واحد من عينة كتيبة المحامين اللي كانوا متخاصمين مع البهائيين في قضيتهم
و قعدوا يهتفوا " الله أكبر " و " ظهر الحق و زهق الباطل , إن الباطل كان زهوقا " و لا كأنهم فتحوا عكا
بعد ما كسبوا القضية و حكم القاضي بعدم أحقية البهائيين في إصدار بطايق مكتوب فيها ( بهائي ) في خانة الديانة
حتي القط كمان .. فاقس الفولة
طيب و لو حبيت أني أتعبد لربي ؟
أنا مش عارف البهائيين بيسموا مكان عبادتهم أيه .. لكن ها نفترض بس في الحالة دي أني بوذي
و عايز معبد علشان أتعبد فيه .. ها أدور كتير .. و مش ها ألاقي
لأنه مفيش
طيب ها نفترض أني راجل غني و معايا فلوس و حابب أني أبني معبد علشان نتعبد فيه ( نحن معشر البوذيين ) يا تري ممكن ؟
للأسف لأ
لأن الدولة لما تيجي تبص في بطايق الناس اللي عندها .. بطبيعة الحال مش ها تلاقي ولا نفر واحد بوذي
لأن كلهم مطلعين بطايق من عينة ( كده و كده ) و أغمزلك بعيني الشمال
و الدولة ها تقول لي أنت عبيط يا أبني و لا أيه .. و هو أحنا عندنا في مصر بوذيين ؟ أخزي الشيطان يا أبني و روح نام
ده غير أنك ها تقع - غير مأسوف علي شبابك - في قبضة الجهات الأمنية و أمن الدولة من جديد
( لأن هي دي الجهات اللي في إيدها أنها تطلع لك تصاريح البناء ( بناء علي حالة الأمن
و يرجع مرجوعنا من تاني .. طيب ممكن أطلع بطاقة بأني بوذي ؟
تقول لك : لأ
طيب ممكن أبني معبد بوذي ؟
لمين ؟؟ معندناش بوذيين و الحمد لله
طيب أطلع بطاقة ؟
لأ
و تدور الساقية من جديد .. و يدور معاها الحمار
--
طيب ده الخيال .. أيه هو الواقع بقي ؟
الواقع أني لو كنت بهائي و مقتنع بديني .. كنت ها أعمل بطاقة من عينة ( كده و كده ) و أغمزلك بعيني الشمال
و أقوم أروح لمطار القاهرة الدولي ... و أستنضفلي طيارة بوينج مألوظة كده
بشرط أنها ما تكونش تبع مصر للطيران طبعاً و أهاجر لأي بلد تاني أنشلا حتي دولة أندوجيا العظمي
علشان كده العبد لله بيتفق بشدة مع ( أحمد عبد المعطي حجازي ) اللي صورته تلاقيها علي يمينك
لأ .. لأ .. مش الصورة دي ... دي أودري هيبورن يا عم الحج .... التاني أقرع و عجوز .. أطلع لفوق و أنت تلاقيها
المهم .. بتفق مع عم حجازي في إن حكم المحكمة الصادر في قضية البهائيين هو في الحقيقة
و كما قال هو : أنه حكم بالإفناء
---
يا عم سيبك أحنا بلدنا شعارها في المرحلة الحالية هو الشفافية
واخد بالك .. الشفافية
كده و كده) و أغمزلك بعيني الشمال )
---
: ورد إلينا من مصدر مضطلع نبأ عاجل بهذا الخصوص
يقال و العلم عند الله - و صحفي في جريدة الأخبار - أن هناك واحد بهائي رافع قضية تشبه القضية القديمة بتاعة البهائيين , لكنه (المرة دي مش بيطالب أن الدولة تكتب في البطاقة ( بهائي
هو بس طالب أن الدولة تكتب في البطاقة : ( أخري ) في خانة الديانة زي ما كان حاصل زمان .. أيام البطايق الكرتون
و العبد لله من باب الإحتياط .. يحب ينصح الأخ البهائي المشاكس ده .. أنه لو خسر القضية ما يزعلش
( و يروح رافع قضية تانية و يقترح فيها أن الدولة تكتب في خانة الديانة : ( اللي بالي بالك
... بركاتك يا عم اللمبي
----
