سؤال بديهي ... قانون المرور الجديد 2008 نازل بشوية عقوبات حادة و صارمة و حراقة جداً , طيب أنا شخصياً ساكن في شقة علي شارع رئيسي ( و ده حقيقي فعلاً ) , و العمارة ما فيهاش جراج و دي غلطة مكاتب المحليات .. اللي الفساد فيها للركب .. مين قال لها تسمح بعمارة من غير جراج ؟ المهم ساعات كتير بيكون الرصيف اللي قدام العمارة كامل العدد ... طيب في الحالة دي أعمل أنا أيه ؟؟؟ أيه المطلوب مني يعني ؟؟ عايز أركن العربية و أطلع بيتنا أنام ؟؟؟ كفرت أنا ؟؟ ما أنا مضطر أركن العربية صف تاني .. و ساعتها ها آخد مخالفة من النوع الجامبو
أبو من 600 .. إلي 3000 جنيه و لو أتكررت ها أتحبس كمان
ده غير سحب الرخصة .. و يمكن كمان أقلع الجزمة و الشراب و ييجي أمين الشرطة يمدني علي رجلي بالخرزانة
----
سؤال بديهي تاني
حكاية علبة الإسعافات الاولية دي ... إشمعنا يعني لازم يكون ليها مواصفات خاصة ؟
هو مش المهم المضمون و لا مؤخذة ... يعني لو حطيت شوية قطن و شاش و ميكروكروم في كيس بلاستيك .. ليه مش ممكن ان الحكومة تعتبرها شنطة إسعاف ؟؟ هو مش المهم في شنطة الإسعاف الحاجات اللي فيها .. و لا المهم الشنطة ذات نفسها ؟
! و لا العملية ... زي ما هو واضح سبوبة مماثلة لسبوبة الحزام .. فاكرينها
لازم نعرف مين الباشا اللي مستورد أو مصنع شنط الإسعاف المطابقة للمواصفات دي
و لازم نعرف مستوردها بكام و ها يبيعها بكام
و لازم نعرف ليه مش ممكن نعمل شنطة إسعاف تفصيل ؟؟؟ ليه لازم نشتريها جاهزة ؟؟؟
متهيألي من حقنا نعرف ... مش سر حربي دي كمان
صورة نادرة ( خاص لأستغماية من رويتر ) لصاحب مصنع علبة الإسعافات الأولية
---------
سؤال بديهي تالت
حركة بتحصل معايا كتير ... أكون سايق في منطقة غريبة عليّ .. و مش عارف شوارعها
و أدخل بالعربية في شارع ( بسلامة نية ) و بعدين أكتشف أن الشارع ده إتجاه واحد
طبعاً لا وجود لأي لوحة إرشادية تقول لقائدي السيارات أن الشارع ده إتجاه واحد
طيب إحنا سعادتك لو مش من المنطقة نعمل أيه يعني ؟؟؟ ننجم ؟؟ نفتح المندل .. و لا نوشوش الودع ؟ ؟
في الحالة دي ها أدفع غرامة من النوع الكينج سايز .. من أم 1500 إلي 3000 جنيه مصري
! ده غير سحب الرخصة .. و الحبس لو أتكررت
------------
سؤال بديهي رابع
يعاقب القانون بالحبس مدة لا تزيد على سنة وبغرامة لا تقل عن 300 جنيه ولا تزيد على 2000 جنيه او باحدى هاتين العقوبتين كل من استعمل جهاز تنبيه المركبة فى غير تنبيه لمركبة او لشخص او لحيوان لمنع ضرر جسيم محدق قد يلحق بأى منها
طيب كلام جميل ... لكن مين اللي يحدد ده بقي ؟؟؟
يعني قدام القاضي ... أنا ها أقول قطة عدت من قدام العربية فزمرت انا علشان تمشي .. و أمين الشربة ها يقول ده كان بيزمر علي لحن أغنية ( كوكو جامبو ) و هو بيرقص
و مع إننا كلنا عارفين زمة و شرف أغلب أمناء الشرطة المصريين .. منهم لله
ها تمشي كلمة أمين الشربة طبعاً ... إلا بقي لو كنت أنا ظابط و لا مستشار
ده غير أن العقوبة مبالغ فيها قوي ... و عدت منطقة العقاب إلي منطقة القسوة ... يعني أنا أتحبس سنة بحالها علشان ضربت الكلاكس و ما معاييش ألفين جنيه حق الغرامة ؟ و أبقي قاعد في السجن جنب واحد ضرب التاني بمطوة و أخد 6 أشهر ؟؟
-----------
( سؤال بديهي نمرة ..( مش فاكر نمرة كام بصراحة .. أنت شوف اللي فاتت كانت نمرة كام و زود رقم مع نفسك
طيب أنا لا قدر الله لقيت عربية عاملة حادثة في الطريق و نزلت أتمختر و معايا شنطة الإسعاف العجيبة
الراجل سواق العربية اللي عمل الحادثة ها يبقي في حالة من الأتنين
يا إما فاقد الوعي .. يا إما صاحي
لو فاقد الوعي .. المفروض إني ما المسوش
لو صاحي بقي ها أقول له مالك حاسس بأيه .. و ها أقيس النبض .. و أقول له أفتح بقك و طلع لسانك .. و قول آآه
طيب .. خد نفس عميق و أكتمه .. خد النفس علي سدرك .. طيب كح كده .. أعطس طيب
لا ... لا ... انت زي الفل يا راجل .. أنت بس بتتدلع علينا
خد أمسك إزازة الميكروكروم دي و علبة الشاش .. و شوف أي جرح عندك أدلق عليه شوية ميكروكروم و لف عليه شوية شاش
و لو حاسس أن بطنك وجعاك ممكن تأكل شوية قطن و تبلّعهم بشوية ميكروكروم علشان لو في عندك جرح داخلي و لا حاجة
و لو فاض شوية ميكروكروم كمان .. هات عينيك ها أقطر لك فيهم شوية .. علشان يفنجلوا و يبقوا زي عينين البقرة
و لو فاض برضه .. لف الباقي في ورقة و خده البيت و أهو تخش بيهم علي العيال .. بدال ما تخش عليهم و أيدك فاضية
خلاصة القول .. أنا مش عارف أنا ها أعمل أيه بالشاش و الميكروكروم
و إفرض جيت أكحلها عميتها .. و ضريت المصاب أكتر .. يا تري في الحالة دي ها يبقي من حقه يرفع علي قضية و لا أيه بالظبط ؟؟
مش المفروض برضه حد يعلمنا نعمل أيه بالصلاه ع النبي بعلبة الإسعاف دي ؟؟
----------
و الآن أترككم مع بعض العلامات التوضيحية علي الطريق
لوحة تعبر عن إرتفاع أسعار البنزين
إستخدام الكلكس بشكل مفرط يعرضك للمسائلة القانونية
مش عارف ... بس اللوحة فيها حاجة غلط
----
