معالي الوزير عثمان محمد عثمان
-----
الكابتن اللي أنا مُعجب بصورته و مبروزها في رأس الموضوع ده .. وزير مصري حالي
بتقول أيه ؟؟ ما تعرفوش !! أزاي ما تعرفوش
ده أثبت جدارة ملحوظة و تمت إعادة إنتخابه في 31 ديسمبر 2005 للمرة الثانية علي التوالي
و معاليه .. وزير وزارة مهمة جداً .. رغم أن أغلبنا عمره ما سمع عنها
( و هي وزارة ( التخطيط والتنمية المحلية
الوزارة دي كما هو واضح من أسمها مهمتها هي التخطيط لمستقبل أفضل و تنمية المحليات
يعني ممكن تقول أنها وزارة من أهم ما يكون بالنسبة لمستقبل مصر
----------
و الوزارة دي كانت في الأصل وزارتين متفرطين من بعض .. و هما وزارة التخطيط , و وزارة التنمية المحلية
و لما أعادوا تفنيط الكوتشينة قرروا دمجهم في بعض لتصبح : وزارة التخطيط و التنمية المحلية
--------
طيب .. أنت بتقول الكلام ده ليه يا عم الحج ؟
ده .. سؤال جميل
أنا بقول الكلام ده ليه بقي .... بص يا سيدي
---------
(مع إقتراب عيد ميلاد إعادة الثقة في معالي الوزير عثمان محمد عثمان ( 31 ديسمبر
هل علينا معاليه بتصريح لولبي .. ممكن أننا نعتبره .. عيدية معالية للشعب بمناسبة عيد الأضحي المبارك
و أعياد رأس السنة و عيد الميلاد المجيد
( موسم بقي .. كل سنة و أنتم طيبين )
: قال سعادته
" من ينفق جنيه و نصف ( نعم جنيه و نصف ) علي مأكله و مشربه في اليوم الواحد , لا يُعتبر من الفقراء "
--------
.... معالي الوزير
إحنا كده بصراحة .. أتطمنا علي التخطيط .. و تنمية المحليات
... معالي الوزير
كل سنة و أنت طيب
-------
