هو صحيح أبن الوز عوام ؟؟
علي العموم هو لو ما عرفش يعوم .. ها يعوموه بالعافية
بكيفك .. غصب عنك .. هو ها يعوم يعني ها يعوم
قريت الخبر ده من فترة قريبة
" قبل أيام، أعلنت شركة “العدل غروب” عن بدء تصوير فيلم “شارع 18”.
و أبطال الفيلم هم أحمد فلوكس ودنيا غانم وعمر يوسف.
الأول هو نجل الممثل فاروق فلوكس، والثانية هي كريمة سمير غانم ودلال عبد العزيز.
أما الأخير فيقف للمرة الأولى أمام الكاميرا، آملاً استقطاب القليل من الأضواء،
خصوصاً أنه نجل حسن يوسف وشمس الباردوي. "
طبعاً أنت لو سينمانجي قديم ( جاية من السينما يعني )
ها تلاحظ أن البوستر ده نظام جزء من الوجه في شريحة طولية
أتكرر كتير قبل كده في الأفلام الأجنبية
x menيمكن كان آخرهم فيلم
ocean's eleven بل أن الفكرة دي قديمة جداً لدرجة أنهم أستخدموها في
الأصلي بتاع فرانك سيناترا
لكن علي العموم دي مش مشكلتنا دلوقتي ..
ده غير أن الواحد أتعود علي نظام الإستسهال ده بصراحة
المهم
حسبتها في دماغي كده .. مع العلم أني مش متابع جيد .. و لا حتي متابع أصلاً .. للسينما و التليفزيون المصري
لكن علي قدر معلوماتي القليلة حاولت أحسب أولاد الممثلين اللي بيمثلوا .. يطلعوا كام واحد ؟؟
و في دماغي عملت لستة حلوة .. خد عندك :
أبن أحمد ذكي و أولاد عادل إمام, و أبن صلاح السعدني , و أبن فاروق الفيشاوي ,
و بنت سمير غانم , و بنت كرم مطاوع , و بنت فريد شوقي , وبنت زيزي مصطفي
و أبن سعيد عبد الغني و أبن فاروق فلوكس , و أبن أحمد ماهر و أبن مصطفي الدمرداش ,
و أبن جلال عبد القوي , و أخو إلهام شاهين الصغنن و بنت أشرف عبد الغفور ,
و أولاد محمود ياسين الأتنين في عين العدو و الحسود ,
و أولاد المخرج توفيق جلال ربنا يخليهم له يا رب
------
كل أولاد الفنانين دول أتحفونا بتمثيلهم و أتفرضوا علينا في التليفزيون و السينما
و العملية أصبحت نسبية .. يعني مثلاً لو أنت أبن ممثل نص كم
(يعني أدوار تليفزيونية , و سينما علي خفيف و مشي حالك )
يبقي ها تبدأ في المسلسلات اللي بقت تكية أبوهم ..و تهوبص فيها براحتك
و والله لو ربنا سهلهالك و الجمهور شاف أن دمك مش تقيل قوي يعني
لدرجة الفقع و إنفجار المرارة .. يبقي تلعب في السينما أدوار معقولة أو بطولة مشتركة
أو بمعني أصح ( تأخد أي دور يجيلك و السلام )
و بعد كده تخش بفيلم بطولة مطلقة
و متخافش .. ها يحصل أيه يعني ؟؟
ها يسقط أكتر ما سقط فيم ( أشتاتاً شلتوت ) بتاع مدحت صالح ؟؟
مش ممكن أبداً
أما بقي لو كان أبوك ممثل تقيل و مترستق في الوسط السينمائي
يعني حاجة كده زي عادل إمام و لا أحمد ذكي
يبقي ليه تتعب نفسك ؟؟ أديها بطولة خبط لزق من أولها
و مش مشكلة لو أول فيلم ما نجحش .. عادي خالص
أعمل فيلم تاني و تالت .. و يكونوا بطولتك برضه
و ما تخافش من حاجة .. لو أفلامك سقطت كلها و فلستلك كام منتج .. و لا يهمك
تكية أبوكم ( اللي هي المسلسلات ) أبوابها مفتوحة لكل اللي بيفشل في السينما
و فلوسها حلوة برضه
يعني ها نشوف أولاد البهوات الممثلين الكبار في السيما و في التليفزيون
و خريجي معهد السينما و معهد الفنون المسرحية يبقوا يروحوا يبيعوا فجل
و لو حد منهم ربنا كرمه .. يمكن يطلع كومبارس في فيلم و لا مسلسل
و اللي مش عاجبه يخبط راسه في الحيط
أو يبيع التليفزيون بتاعه و يشتري بداله مروحة توشيبا
بس يبقي يتغطي لو حب ينام تحتها لحسن ياخد برد
