-------
وحياة أمك ؟
------------
عيد الأم طلع ( خير اللهم إجعله خير ) حرام
لأن البهائيين طلع عندهم عيد ( النيروز ) في ذات نفس أم اليوم ده ( 21 مارس ) و لذلك لا يصح بتاتاً أننا نعيد معاهم
إذ إنما لا قدر الله نبقى زيهم في كفرهم , و يبقى وضعنا أيه أحنا وسط الأمم المتحدة لما نعيد معاهم في نفس اليوم ؟
لكن لا محيص من أننا ننقل الإحتفال إلي يوم آخر على أن ألا يكون عيداً للأم فقط و لكن للأسرة كلها
و على ألا نشابه فيه النصاري أو اليهود أو ما شابه من معشر الكفار الأشرار .. أصحاب النار
و ما إنفتأ الشيخ المفوه يصدح بمسجوع الفتاوى و أطايب الخطب .. إلى أن دخل العبد لله إلى جنة النعاس
------
معلش إحنا بنتكلم
--------------------------
انتشرت في الأونة الأخيرة أنواع من السمك الفيليه المجمد وبأسعار رخيصة , قيل لنا أنه سمك فيتنامي
النوع ده كان عليه إقبال شديد جداً , لدرجة أن أنا نفسي جربته بعد ما شفت الهجوم اللي كان بيحصل عليه في المحلات
إكتشفنا بعد كده أن السمك ده من نوع سمك الباسا, أو القراميط الفيتنامية و حذرونا منه و قالوا ده بيعيش في مياه ملوثة و بيأكل الزبالة ( زي بقية القراميط .. و من ضمنهم القرموط الأفريقي .. بتاعنا ) و أن الإكثار من تناوله ها يسبب أمراض خطيرة
قوم أيه بقى ... قوم الدولة تبعت لجنة ( تقصي الحكائك ) لفيتنام .. قال ليه بقى .. قال علشان تعاين و تشوف و تحلل القراميط القيتنامية
إحنا طبعاً نتمنى كل التوفيق لهذه اللجنة بس مش قادرين نفهم ... هو مش كان أسهل لو قعدت اللجنة دي في مصر و أخدت عينة من القراميط الفيليه ( أم 7 جنيه الكيلو ) من المحلات و حللتها هنا و قالت لنا أيه النتيجة ؟
-------
فركيكو ... لا تلمني
---------------
شركتنا أسمها كويست نت .. ها تدخل معانا .. تشتري بما قيمته ( 600 ) دولار أو أكثر
أشتري أيه ؟
هو : ممكن تشتري حاجة أسمها البايو ديسك .. و ده لا سحر و لا شعوذة حتة إزاز تحطها في المية تقوم منقياها , أو ممكن تشتري حاجة أسمها ( تشي بندنت ) و دي عبارة عن أسطوانة إزاز من أردأ الأنواع مربوطة بفتلة .. دي بقى تلبسها تقويك و تساعدك على التركيز
أنا : " حضرتك بتكلم واحد صيدلي ... و علشان هو مؤدب ها يقول لك بس : " أحيه إسكندراني .. أيه الهجص ده ؟
هو : طيب بلاش .. ممكن تشتري ساعات سويسري أو مشغولات ذهبية
انا : أنت عبيط يا وله و لا بتستعبط .. يعني متوقع أني أثق في الشركة اللي بتبيع حتة إزازه ما عليهاش حتى كلمة
( made in china )
و أدفع فيها 600 دولار ... متوقع مني أني أثق في الشركة دي لدرجة أني أشتري منها دهب ؟؟
هو : أسمع كلامي للآخر بس .. ما أنت ها تشتري حاجة .. أي حاجة .. و كل ما تجيب ستة و تخليهم يشتروا أي حاجة من الشركة دي الشركة ها تديلك عمولة 250 دولار لأنك ها تبقى وكيل للشركة
انا : صلاة النبي أحسن
-----------------
pyramidal scheme يا جماعة الشركات دي بتعمل حاجة أسمها
دي نصباية قديمة جداً .. بس المشكلة أن الناس مش عارفاها
علشان تعرف أكتر
click here
click here
-------------
