قناة سبيس تون للأطفال ... متهيألي كلنا عارفينها القناة دي بتعرض كرتون توم و جيري , و العبد لله من عشاق توم و جيري و شبه حافظ كل حلقاتهم و بالذات الحلقات القديمة بتاعة ( حنا /باربيرا ) و فريد كويمبي و موسيقي العبقري سكوت برادلي .. المهم في يوم قاعد بتفرج علي الكرتون علي قناة سبيس تون دي و فجأة حسيت أن في حاجة غلط في الكرتون
أفتكرت بعد كده أن في حتة ناقصة في الكرتون .. و هي إن توم كان بيصارع رغبته الشريرة في أذية جيري و كان طالع له توم صغير بجناحيت علي كتفه الشمال قال يعني ملاك و توم صغير أحمر و بقرون علي كتفه اليمين قال يعني الأفكار الشريرة و توم محتار بينهم كل واحد بيحاول يقنعه برأيه
الحتة دي بقي ... شافوا في قناة سبيس تون أنها حرام .. و حذفوها .. و في أكثر من حلقة من توم و جيري
ليه ؟؟ الظاهر و الله و أعلم أن تصوير الملايكة و الشياطين حرام شرعاً
! تعليق من عندياتي : أحيه ... أنتوا ها تقصقصوا في توم و جيري كمان ... يالهوي ؟؟
-------------
" الجمال الحقيقي هو جمال الروح و السمعة الحسنة"
الجملة اللي فوق دي هي واحدة من الرسائل و الحكم اللي بتطلع في الفواصل الإعلانية في قناة سبيس تون للأطفال
الجملة جيدة من الوهلة الأولي لكن أنظر أعمق و لاحظ الشرخ
ليه لازم تأخذ موافقة الجماعة و الرأي العام السائد .. عن طريق السمعة الحسنة ؟
-----------
وزراء و سفراء و حكام المستقبل
طالبة متفوقة في جامعة الأزهر رايحة تستلم جائزة من مجلس الأساتذة لتفوقها الدراسي وقفت قدام الدكتور أحمد الطيب رئيس جامعة الأزهر و بصت لأيده الممدودة لمصافحتها و قالت له معلش .. ما بسلمش علي رجالة
طبعاً نظراً للسكس بلف الفظيع الذي يتمتع به رئيس الجامعة و نظراته الزئبقية الفتاكة يلتمس صاحب المدونة كل العذر لصاحبة العفة و الطهارة و يساندها في موقفها الثابت في عدم مصافحة الرجالة و غير المسلمات من النساء و الصبية الصغار من أبناء المسلمين من سن سبع سنوات فما فوق
و يهيب بها إلا تصافح زوجها إلا في حالات الضرورة القصوي فقط
--------------
زوجة البواب المؤمنة جداً
قاعد في بيتنا في أمان الله .. سمعت صوت إستغاثة و صراخ و صوت خبط جامد
نزلت بالترنج الكحلي و الشبشب أبو صباع لمدخل العمارة أشوف أيه الحكاية , لقيت واحد محبوس في الأسانسير في الدور الأرضي حاولت أفتح الباب بتاع الأسانسير معرفتش كان معصلج .. قلت له معلش ها أروح أنده لك البواب هو معاه مفتاح الأسانسير و أنا حتي عارف هو بيشيله فين في أوضته ( جنب باب الأوضه علطول من جوه علي عليقة مخصوصة للمفاتيح ) و طمنت الراجل المرعوب جوه , و رحت لأوضة البواب .. ناديت كتير جداً و فييييين لما عبرتني مراته من جوه ( و هي ست منقبة و مؤمنة جداً جداً و دايماً تخدم في المسجد اللي جنب بيتنا و مش منظمة الأسرة و لله الحمد عندها سبع عيال ) و قالت لي لما لاحظت أني مش ناوي أبطل منادية
"هو مش موجود "
قلتلها طيب المفاتيح عندك في العليقة اللي جنب الباب ناوليني مفتاح الأسانسير في واحد محبوس جواه
قالتلي معرفش
قلتلها يعني أيه معرفش ؟؟ أنا عارف أنه بيشيله هناك . دوري أنتي بس
( الكلام ده كله و هي بتكلمي من ورا الباب المقفول )
قالتلي مقدرش أفتحلك لأنه مش قاعد دلوقتي هنا .. أستني لما يرجع يبقي يجيبهولك
- يا ستي في واحد محبوس في الأسانسير أنتي مش سامعه الخبط و الصراخ ؟ -
.... طنشتني و ما ردتش
أنا كنت ها أتجنن أيه الناس دي ؟؟ ده أسمه تخلف
يا حجة طيب أفتحي الباب نص فتحة و أرمي المفتاح و أنا أبقي أجيبه من الأرض
طناش تام .. و الراجل اللي جوه الأسانسير سامع الحوار ده و لقيته بيزعق و بيقول لها يا ستي أرميله المفتاح أنا بقالي نص ساعة محبوس
و هي مطنشانا علي الآخر .. في الغالب راحت تنام
و فين بقي لما شرف البيه البواب و فتح الباب و جاب المفتاح و فتح للي في الأسانسير بعد ما كان أستوي
و ما نسيتش أسأله " أنت كنت شايل المفتاح فين ؟ " قال لي عادي جنب الباب من جوه علي العليقة ليه ؟
قلت له لا أنا بس كنت بسأل و علي فكرة أنا لازم أعمل نسخة للمفتاح ده و دلوقتي حالاً
-----------------------
