... المسلسلات المصرية في رمضان كالعادة
ليست سوي فاصل من التعذيب المستمر
مقولة من الممكن أن تستعملها لكي تصف رمضان الحالي , أو رمضان السابق , أو حتي رمضان القادم
( بل و ربما نتجرأ و نقول أنها مقولة من الممكن جداً أن تستعملها لتصف كل شهور السنة ( طبعاً بعد أن تحذف كلمة رمضان
و الغريب أن كل المسلسلات أجمعت منذ زمن أن مصر - و لله الحمد - هي بلد المليونيرات
فكل المسلسلات تقريباً تتحدث عن مليونيرات و قصور و رجال أعمال .. و تتطاير في حلقاتها الملايين ذات اليمين و ذات اليسار في بعزقة لا مبرر لها إطلاقاً
ففي مسلسل ( يتربي في عزو ) تجد أن الأخ حمادة
مزنوق حبتين في حسبة 10 .. 15 مليون كده
و في مسلسل ( الفريسة و الصياد ) تجد رجل الصحافة المشهور و كل معارفه من عينة ( سعادة الوزير , و سعادة اللواء مدير أمن القاهرة ) و لا تستغرب حين تجده يمارس هوايته المفضلة في لعب التنس في نادي الجزيرة
فهذه هي الهواية الشعبية للمصريين علي فكرة .. هي و الإسكواش
----------
حسناً ... لا يعيب الدراما أن تتطرق للأغنياء , بل و تسرد لهم القصص
لكن العيب أن يكون الأغنياء ... و الأغنياء بتوحش .. هم كل الدراما و مصدرها الوحيد
و عامة الشعب من الفقراء و متوسطي الدخل .. إذا جاء ذكرهم .. فهو علي إستحياء و بدون عمق
و بدون أدني محاولة للتطرق لمشاكلهم بنظرة موضوعية , التي هي في الحقيقة مشاكل أكثر من 90 % من الشعب المصري
----
و هناك أيضاً ظاهرة الهبل الدرامي .. و هي ظاهرة برع الكتاب المصريين فيها إلي حد كبير
خد عندك مثلاً : فاصل من الهبل و العبط الدرامي و العلمي في مسلسل ( يتربي في عزو ) و تتمثل في سذاجة التطرق لموضوع اليورانيوم و الطاقة الذرية
ففي هذا المسلسل الميمون .. تلعب نهال عنبر دور عالمة ذرة مصرية كانت في الخارج و عادت إلي مصر
و تسأل واحد شغال في السلك الذري ..ألاقيش عندك حتتين يورانيوم علشان عايزة أشتغل عليهم
لا و الأنكح أنه يقولها طيب أنا ها أجيبلك 2 جرام كده بس في الخباثة علشان أنتي ممنوعة من ممارسة المهنة
ليه طيب يا عم الحج ؟ ... علشان ألمانيا .. الله يجحمها مش عايزانا نستفيد بمهاراتك اللولبية في مجال الذرة
ملحوظة : طبعاً الكلام مكانش كده .. لكن أقسم أن هذا هو معني الكلام و لكن بصياغتي الشخصية
و المصيبة أن الكلام كان بجد مش بهزار في المسلسل .. كارثة طبعاً
و الكلام يجعلك تتخيل إنها ها تشتغل علي اليورانيوم في مطبخ بيتهم مثلاً .. أو تتخيل إنها ها تعمل شوربة يورانيوم بالأرانب إنما إيه .. تستاهل بقك
و إنك ممكن تسكرتلك حتتين يورانيوم في جيبك من معهد بحوث الطاقة الذرية و تروح تلفهم في سيجارة و تخمس فيها مع واحد صاحبك و تعمل لك بيهم دماغ إنما أيه ... ذرية
------
و الكوميديا السوداء ... هي إنك بتلاقي الست جمالات اللي عايشة في المساكن الشعبية
أو في مساكن الإيواء لأن بيتهم وقع علي دماغهم من سبع سنين و لازالوا منتظرين أن الحكومة تحن عليهم بشقة علي حدود مصر و ليبيا علي سبيل التعويض
الكوميديا السوداء إنك بتلاقي الست جمالات دي بتعيط قدام التليفزيون لأنهم طردوا حمادة عزو ( بطل مسلسل يتربي في عزو ) من القصر اللي كان عايش فيه .. و إضطر - يا حرام - أنه يرجع تاني يعيش في شقتهم القديمة في حي جاردن سيتي
علشان ما عرفش يسدد ال 15 مليون اللي كان مستلفهم من البنك
أنا و الست جمالات .. راضيين ذمتكم
بذمتكم أنتم .. الكلام ده مش يبقي أسمه حرام
حرام ده و لا مش حرام ؟؟
--------------------
