محمد كان صاحبي أيام المدرسة ، كان أحياناً بيزود حرف سين في آخر الكلام .. حاولنا نحدد إزاي و ليه بيقرر أنه يحط حرف السين في آخر الكلام معرفناش .. كان واضح أنها بتطلع غصب عنه ، ساعتها قلنا طالما في ناس عندها ( لدغة ) و مبتعرفش تنطق السين يبقى مش عجيبة يكون في ناس تانيين - زي محمد - بينطقوا السين أكتر من اللازم .. محمد قرر أنه يحب زينبس ( زينب )، بس كانت مشكلته أنه مش عايزها تلاحظ حكاية السين
محمد كان مريض بالسكر كنا عارفين أنه بياخد كل يوم حقنة قبل ما ييجي المدرسة و كنا عارفين ايه هو السؤال اليومي اللي بتيجي أبله كارولين تسألهوله في ودنة ، ساعتها مكنش عندنا فكرة واضحة عن مرض السكر ، و إعتقدنا أن من أعراض مرض السكر أنك تزود حرف سين في الكلام و طبعاً ده معناه أن الألدغ في السين مش ممكن يجيله مرض السكر
شنطة محمد المدرسية كانت دايماً مليانة حلويات ، ساعات كنا بنخطفها منه و نكبش منها لكن في أغلب الأوقات كان بيوزعها هو علينا ، انا شخصياً كنت بحبه لأن ساندوتشات شنطتي انا كمان كانت بتتسرق و أحياناً - لما أكون جعان - كنت بوزع منها على زمايلي بنفسي .. و الفكرة هنا أني لما أوزع ساندوتشاتي عليهم ممكن يسيبولي ساندوتش ، غير أني ها أترحم من الجري و النطنطة ورا شنطتي لما يخطفوها مني ، ده غير الإسفين الاباليسي اللي كنت بقصد أعمله لما أفرش ساندوتشاتي على الدكة و أسيبهم يتخانقوا عليها بعيد عني ، أعتقد أن محمد كان بيحسبها بنفس الطريقة
كان عندنا ولد أسمر زميلنا أسمه (علي علي سعيد ) كان من نيجيريا و كان عنده هواية جميلة هي أنه يقلب جفون عينيه و يطلع يجري ورا البنات و هما بيصوتوا و في مرة زنق بنت في ركن الحوش و هو قالب جفونه ، البنت قعدت تصوت و بعدين بللت جيبتها و أغم عليها
الفترة اللي قعدها علي علي سعيد في مدرستنا كانت قصيرة و جدي كان بيوصله لبيتهم هو و أبوه كل يوم معانا في العربية ، ساعتها كنت متضايق قوي من جدي بس ما أتكلمتش معاه في الموضوع خالص مش عارف ليه ، لكني لحد النهاردة مش قادر أفهم إزاي جدي و أبو الولد ملاحظوش أن أنا و علي عمرنا ما كلمنا بعض و إحنا مرزوعين في كنبة العربية و لا كلمة واحدة .. انا كنت خايف منه .. و هو غالباً كان بيحتقرني
في يوم و احنا بنلعب كورة شراب في الفسحة قرر علي أنه يضايق زينبس ، و كان محمد واقف جون و بالصدفة كان ماسك الكورة الشراب في إيده ، و فجأة ساب الماتش و راح ناحية علي و قال له شوية كلام مليان حرف السين لدرجة اننا مفهمناش منه حاجة غير جملة مبتورة " أمك بتمشي حافية " و بعدين قام حاطط الكورة الشراب في كوباية الكوكاكولا اللي كان علي ماسكها
هنا تسارعت الأحداث .. المهم أن علي مسك محمد ضربه لحد ما خلاه يعيط ، و بعد ما خلص عياط ضربناه إحنا كمان ، و انا للأسف شاركت في الضرب علشان شرابي كان عنصر من عناصر الكورة الشراب اللي حطها محمد في كوباية الكوكاكولا
بعدها مرت الأيام علينا من غير جديد .. كورة شراب .. مازنجر .. ضرب العشرات .. حصة الدين .. لولاكي .. و في يوم شفت محمد و هو واقف مع زينبس في ركن فاضي من حوش المدرسة و لاحظت أن زينبس طلعت من شنطتها ساندوتش ، قسمته نصين ، أدت محمد نص و أبتسمت
------------
هوامش : الصورة من هناك 
