الكلب لما يتعب
تقدر ؟
شغل مخك
إعقل .. فكر
يمكن تؤمن
يمكن تكفر
يمكن تتواضع
تتكبر
جايز تعمل
كل ده و أكتر
لكن تقدر
تقدر تنكر
أن بلدنا
بلد العسكر ؟
عسكر عسكر
عسكر عسكر
في قسم الشرطة
في قسم الشرطة
أكلت ضرب و شبعت جوع
في القلب نار
في العين دموع
حرثوا في ظهري
و نهشوا الضلوع
في قسم الشرطة
صلبوا يسوع
----
سين و جيم
... سألوني
... رديت
قلت : ما شفتش ... و كتبوا : شاف
قلت : ما خفتش ... و كتبوا : خاف
.... يأست
بكيت
أدوني ورقة , و قلم جاف
و قالوا لي : أمضي علي الإعتراف
صرخت .. لأ .. لأ ... لأ
و مضيت
محكمة
قدام القاضي
حلفت أني أقول الحق
سألني : ضايقوك ؟
قلت : لأ
حضرة الظابط مالهوش ذنب
و حضرة المخبر مالهوش ذنب
كان لازم أعرف إن أنا كلب
و الشرطة في خدمة الشعب
--
.... سيادة القاضي
عندي رجاء
الكلب تعب ... محتاج يرتاح
أحكم ع الكلب بإعدام
