بمنطق الأفلام الهندي الغير منطقي إطلاقاً ، إكتشفت أن النهارده بالتحديد أتم هذا البلوج اللعين 3 سنين بالظبط . و إكتشفت ده لما كنت بشوف أول بوست كتبته على المدونة ، العجيبة أن عيد ميلادي هو كمان النهاردة ( 22 يوليو ) اليوم اللي بينتهي فيه برج السرطان و يبدأ برج الأسد ، يعني انا بقالي 3 سنين مش واخد بالي أني فتحت المدونة يوم عيد ميلادي

سعيد بتجربة التدوين عموماً .. و أجمل ما فيها اني إتعرفت عن طريقها بشكل شخصي ( بني آدم لبني آدم ، مش مجرد شاشة كمبيوتر لشاشة كمبيوتر ) على مجموعة من أجمل الأصحاب اللي عرفتهم في حياتي .. على فكرة انا محتاج أقولهم أني بحبهم قوي

سعيد لأن المدونة مش مشهورة .. سعيد لأن المدونة شبه عربية الفول بتاعة عم أحمد اللي عارف زباينه نفر نفر .. مش شبه ستاربكس اللي غالباً بيكون مليان بالناس و برضه بتحس فيه بالغربة

سعيد لأني قدرت أستمر في ممارسة واحدة - مُجدية كانت أو غير مُجدية - 3 سنين كاملين بإستمرارية و مثابرة أدهشتني ، مع أني من رواد فن صناعة الأشياء غير المكتملة

سعيد حتى و انا عارف أن زمن المدونات قرب ينتهي - ده إن مكانش إنتهى فعلاً - و إحنا دلوقتي في العصر الفيسبوكي .. سعيد حتى و انا عارف أن المدونات ها تبقى عاملة زي شريط الفيديو اللي بدأ رحلة الإنقراض أول ما قالوا يا كمبيوتر ، و بفكر جدياً أني أستمر و بدماغي الوسخة أسيب نادي الفيديو بتاعي مفتوح لأطول وقت ممكن لغاية لما يقرر آخر جهاز فيديو في البلد أنه يبطل يعرض أفلام 

---
i Believe in Miracles : Hot Chocolate

هوامش : الصورة من ألبوم عماد ماهر

... عِتَاب ...

ملضوم من جلدي في طرف الخيط

و بَكَرَّة الزمن بتكُر

 زهقت

يا تقطعني بشفايف مقص

يا تسيبني من خرم الإبرة أمر

...

فهمت

تنغزني بسن الإبرة .. ألف

و أرجع أدخل مطرح ما طلعت

تعقُدني

أخنق نفسي بنفسي و أموت

و الموت مش حرفة

ده سر

...

الوجع

آه من الوجع

و طراطيف صوابعك

لما تدفني في حتة قماش

تلفني على رقبة زرار

في ياقة جاكت ما بتلبسهاش

.......................

Dee Edwards - Why Can't There Be Love? 

..

Mercedes Sosa ( 7/1935 - 10/2009 )

Gracias la vida 

وداعاً لانيجرا  ...  يا صوت من لا صوت له 

الله , Buda , Dios , Yahve , God .

I only ask of God don't let me be indifferent to the suffering

عرفته منذ 3 سنوات

طوال معرفتي به كان دائماً في الفترة بين الإستعداد لإجراء عملية جراحية .. أو في فترة نقاهة خارجاً لتوه من أخرى

تظهر قطعة شاش تنضَّح دماً على رقبته ... تمكث حيناً .. تمتص بعضاً من قوته ، ثم ترحل تاركة وراءها ندبة صغيرة لتظهر بعد فترة في مكان آخر من جسده

-----

" أتعلم .. بالأمس حاولت الإنتحار "-

تصدمني إبتسامته و هو يتكلم فأسأله

" لماذا ؟ " -

: يتجاهل السؤال- فكلانا يعلم الإجابة - و يكمل حديثه قائلاً

" أفرغت علبة مبيد الحشرات على طبق البازلاء ، أكلتها بنهم شديد حتى آخر حباية ثم تمددت على فراشي و نمت "

" ثم ؟ "-

" لا شيء .. لا شيء على الإطلاق ... صحوت في اليوم التالي نشيطاً كالقرد " -

" حمداً لله على سلامتك " -

: ضحك قائلاً

" حسناً شكراً لك .. لكن كما تعرف ، سلامتي لم تكن أبداً الهدف من تلك المحاولة " -

----

" كان أبن موت "

قالها أحد المعزين في سُرَادِقٌ العزاء

صافحته بنصف وَعْي ... ثم تركته لأجلس على الكرسي البعيد في ركن البهو أجتر الذكريات

---

" شغل لي أغنية ( سوسو كورن فليكس) يا جيمي "-

" حاضر يا سيدي " -

( و عندك واحد ( سوسو كورن فليكس

Francoise Hardy-comment te dire adieu

( الغريبة أن الأغنية اللي كنت بتحبها بتتكلم عن واحدة زعلانة من حبيبها لأنه مش بيعرف إزاي يقول ( وداعاً

أنا عرفت دلوقتي أن أفضل طريقة هي أنك ما تقولهاش .. بالطريقة دي تظل موجوداً للأبد

بطريقة أو بأخرى

mais .. Vous n'avez pas dit au revoir mon ami !!

--