انا عايز أعيش في إعلان
أيوه .. عايز أعيش في إعلان تليفزيوني .. لأن الناس جوه الإعلانات دايماً بتبقي مبسوطة و
و العائلات دايماً بتبقي سعيدة , و منخرطة في سلسلة الرحلات اللانهائية دي ... يعني دايماً العيلة في
واخدين بعضهم و قاعدين في جنينة جميلة و الأطفال بتلعب في الخلفية و الزوج و الزوجة بيحبوا بعض و حنينين علي بعض
الناس كلها نضيفة جداً .. و الصورة جميلة و مريحة للعين , و الألوان زاهية و منسجمة مع بعضها
في الإعلانات التليفزيونية المشاكل دايماً محلولة .. يعني مفيش مشكلة مهما حصل
" كل كثيراً و عش نحيفاً .... مع أب ترونيك مالتي جيم "
كل ولا يهمك .. معاك الحزام
نفسك تسوق عربية هامر أحدث موديل ... و لا تكسب 2 مليون جنيه ؟
أبعت رسالة أس أم أس علي رقم زيرو سبع بعتات .... بعتتين .. طنش
من غير لا سحب و لا قرعة ها تكسب الجايزة الكبري
نفسك تعمل مشروع
روح لمركز مش عارف مين بتاع المشروعات الصغيرة . يديك قرض سبعة مليون جنيه و أنت واقف
و تروح تعمل مشروعك و تبقي مليونير
نفسك تغني ؟
أبعت رسالة بصوتك الحلو ده علي الرقم اللي فوق
ها يسمعك و يرد عليك المرحوم عبد الحليم شخصياً
لو كنت أقرع ... معندكش شعر
أشتري منتج جود هير العالمي .. شعرك ها يرجع في ظرف أسبوع
عندك مرض السكر ؟ مش مشكلة
أشتري منتج شوجار و خدلك حبتين قبل النوم و ما تنساش تنام علي جنبك اليمين و تتغطي كويس
و ها تقوم زي الفل إنشاء الله
عندك عقم و العياذ بالله ؟
و لا يهمك ... كلية طب صوفيا لقت لك الحل
السحري هو الحل all night منتج
العلبة الخضرا للرجال و العلبة الصفرا للنساء
أوعي تتلخبط و تاخد من علبة مراتك ... يجيلك أستبحس علطول
عندك أمراض مختلفة و متنوعة ؟
مفيش مشاكل
عسل السدر الجبلي هو الحل
برطمان واحد و ترجع شباب و زي الفل
و علشان تتأكد أن ده عسل السدر الجبلي الحقيقي لازم تتأكد أن لونه أسود معكر و ريحته وحشة جداً
" قال إبن حزنبل رضي الله عنه " إن في عسل السدر الجبلي لشفاء لكل الأمراض بإذن الله
------------------
