اجحدك ايها الشيطان، وكل اعمالك النجسة، وكل جنودك الشريرة، وكل شياطينك الرديئة، وكل قوتك،وكل عباداتك المرزولة، وكل حيلك الرديئة والمضلة وكل جيشك، كل سلطانك. وكل بقية نفاقك. اجحدك.اجحدك. اجحدك.
تقولها الأم (بالنيابة عن رضيعها)،من ليتورجيا طقس المعمودية بالكنيسة القبطية

-----------

انا عندي فكرة عن مدن يكرهها النور 

و القبر اللي يبات مش مسرور 

عندي فكرة عن العار

و ميلاد النار 

و السجن في قلبي مش على رسم السور 

(عبد الرحمن الأبنودي - قصيدة الميدان )

-------

( أشك في جميع الناس و لكني أشك بصفة خاصة في المتدينين " ( رواية المرايا - نجيب محفوظ "

---

اعلان بجريدة الأهرام - 11 مايو 1954

قد تختلف وجهات النظر بين الشريك و شريكة و لكنهما يتفقان دائما على تفضيل ( الرئيس ) فخر السجاير المصرية 

" العوا بيقرص على الزهر "

 أحمد شفيق .. المرشح المحتمل للرئاسة-

" الجيش خط أحمر و الزمالك خطين حمر " 

 سليم العوا .. المرشح المحتمل للرئاسة -

"بس يا كفرة "

صلاح أبو أسماعيل- 

" طب مش لاعب  " 

 البرادعي .. المرشح غير المحتمل للرئاسة -

على فكرة سوزان مرة قالتلي أعملها نسكافية قمت تفيت ""فيه قبل ما أديهولها" 

عمرو موسى -

" شوفوا انتوا عايزين تسمعوا ايه و أعتبروني قلته "

  عبد المنعم أبو الفتوح - 

-------------------------

إعلان - روزاليوسف - 21 فبراير 1931

إعلان - روزاليوسف - 21 فبراير 1931

دعك يا عزيزي من حكومتك القديمة و أشرب الجماعة فإني واثق أنك ستشغف بها مثلي 

حكومة الجماعة !! غريب انك ثالث شخص يقدمها لي اليوم مطريا

التطرية حلوة برضك- 

احنا جربنا الاشتراكية و الليبرالية و تعبوا صدرنا- 

و ما تنساش البلغم و نشفان الريق - 

علشان كده بقول نجرب الاخوان ، هيظبطوا البلد -

ليه بقى .. لأنهم مش حرامية - 

 القناعة كنزون لا يفنى -

و البرطمان كله تمنه أربع سنين بس -  

في متناول محدودي الإيمان - 

طب و الحريات في الحكومة دي ايه نظامها؟ -

بقولك توليفة تبغ فاخر و فم فلتر - 

يعني صحيح الكلام ده ؟ - 

و النعمة زي ما بقولك كده - 

أخوان مسلمين .. و شركاه

نيكو تين أم مصر

نحمل الحاجات الحلوة لمصر

----------

 من موشح ( قم ترى ) الأندلسي - انريكو ماسياس و الشاب مامي 

حكمت المحكمة العسكرية على مايكل نبيل سند بالسجن لمدة ثلاثة سنوات في سجن طرة بسبب إنتقاده للمجلس العسكري في تدوينة كان قد نشرها على مدونته الشخصية تحت عنوان ( الجيش و الشعب عمرهم ما كانوا أيد واحدة ) و أصبح مايكل نبيل هو أول سجين رأي بعد ثورة 25 يناير 
من المهم أن نعرف أن مايكل قد كتب على صدر مدونته منوهاً أن جميع كتاباته المنشورة على المدونة تعبر فقط عن رأيه الشخصي ، من المهم أيضاً أن نعرف أن التدوينة نفسها - التي حوكم بسببها - لم تحتوي على تحريض صريح ضد المؤسسة العسكرية و لكنها أقرب للبحث حيث قام بتجميع عدد من الأخبار و الفيديوهات التي تتحدث عن بعض إنتهاكات و تجاوزات المؤسسة العسكرية في الفترة الماضية 

تم إعتقال مايكل من منزله في حي عين شمس بتاريخ 28 مارس و بعد عرضه على النيابة العسكرية تم تحويله إلى المحكمة العسكرية التي حددت يوم العاشر من إبريل للنطق بالحكم ، و لكن حين إتجه محاميي الدفاع للمحكمة أمس لسماع الحكم- أبلغهم رئيس فرع المحاكم العسكرية بأن المحكمة قد قررت مد أجل النطق بالحكم ليصدر غدا الثلاثاء 12إبريل-  إلا أن المحامين وأسرة مايكل نبيل  فوجئوا بأن الحكم قد صدر بالفعل أمس في غياب المحامين وبعد انصرافهم في واقعة غريبة و غير مفهومة 


إنتقدت المنظمات الحقوقية حكم المحكمة العسكرية التي أصدرت حكمها على مواطن مدني يمارس حق أصيل من حقوقه و هو التعبير عن الرأي  كما أعربت عن إستياءها من تجاهل وسائل الإعلام المصرية لقضية مايكل نبيل

و صرحت مجموعة من المنظمات الحقوقية المصرية قائلة : حين يتم العفو عن متشددين قطعوا أذن مواطن مصري ، ويحاكم مدون عسكريا بسبب أرائه على مدونته ، فالعدالة المصرية وحرية التعبير في خطر شديد

لينكات خارجية 

الشبكة العربية لمعلومات حقوق الإنسان 

مدونة محمد مرعي

france 24

أخبار مكتوب

 حكاية حضرة الظابط بطة

في الكام يوم بتوع اللجان الشعبية اللي أتفق المصريين على تسميتهم ب " أيام القلق " و هي الأيام اللي ولّع الشعب فيها أقسام الشرطة و لبست فيها عناصر الأمن طاقية الإخفا كنت مطمئن جداً على سلامة بيتي لأني كنت بتمم بنفسي على التحصينات اللي عاملينها الأهالي في الشارع بتاعنا ، كان عندنا على أول الشارع كتيبة " عم يوسف "  المكلفة بحراسة مدخل الشارع تحت قيادة عم يوسف و أصحابه و كلهم ناس عواجيز بيقعدوا يشربوا شيشة و ساعات يعقموا الجو بحتتين حشيش ، أما آخر الشارع فكان تحت حراسة واحد جاري معرفش أسمه الحقيقي بس كل الناس بتقول له يا " بطة " حتى أبوه ، و كان مجند  معاه شوية شباب كل ما تشوفهم تشم ريحة البانجو و عامل منهم كتيبة لحراسة مدخل الشارع 
 وقتها كل اللي كان يعدي من شارعنا و يكون جاي من ناحية " بطة " كان أبو بطة بيقول له 
" أبني بقى ظابط .. عديت من عليه .. شفت حضرة الظابط بطة .. فتشك و أنت داخل ؟ " 
كان واضح أن أبو بطة فخور فشخ بالمحروس أبنه " حضرة الظابط بطة " اللي واقف على آخر الشارع زي الأسد ما بتعديش منه الدبانة  
المهم .. في يوم بالليل - قرب الفجر - كنت قاعد تحت بيتنا ( اللي في نص الشارع ) عامل نفسي لجنة شعبية بس انا في الحقيقة مستني إمدادات الحجة " أم ريم " - ربنا يكرمها و يعمر بيتها - اللي ما بتتقطعش من سحلب لبتيفور لشاي و كيك كومبليمون منها للجان الشعبية اللي سهرانة تحرس الشارع ، و فجأة سمعنا دوشة و صوت خناقة عالي جاي من ناحية كتيبة حضرة الظابط بطة و بعدين لقينا حضرة الظابط بطة بنفسه جايلنا هو و كام واحد من كتيبة البانجو بتاعته و معاهم راجل غريب لابس بدلة السجن الزرقا و قام داخل حضرة الظابط على أبوه و سأله 
" الراجل ده ما معاهوش بطاقة .. أعديه و لا أمسكه ؟ " 
ساعتها قعدنا بتاع عشر دقايق نحاول نستوعب السؤال .. و فهمنا بعدين في الليلة دي أن حضرة الظابط بطة ما بيعرفش يقرا و لا يكتب .. و مش بس كده ، ده كمان نظره ضعيف جداً ، و كان بيوقف الناس و يمسك بطايقهم - اللي لا يعرف يشوفها و لا يقرأها - و يسألهم :  دي صورتك ؟ 
و اللي يقول له آه .. يعديه 
و طبعاً بقية كتيبة البانجو إيدك منهم و الأرض بإعتبار أن حضرة الظابط بطة هو أذكى واحد فيهم 
المهم .. في النهاية مسكنا السجين الهارب ده و سلمناه للجيش  لكن إحساسي بالأمان راح 

------

حضرة الظابط بطة .. أصبح بالنسبالي رمز أو أيقونة لخيبة أملي اللي حطيته في حد أو مؤسسة و أتطمنتلها و بعدين خاب أملي
--
يعني لما الجيش ( اللي واقف يحمي الثورة ) يعمل حركات من عينة ضرب المتظاهرين و سربعة الإستفتاء اللي بعد ما حضرتك - زي الشاطر - رحت و صوتت فيه على سبع مواد لتعديلات دستور 71  يقوم المجلس العسكري عاملك إعلان دستوري تاني خالص من 62 مادة ، على طريقة وشك للحيط و قفاك ليا
ده غير الإتهامات للجيش بتعذيب النشطاء السياسيين و إعتقالهم و فض إعتصام كلية الإعلام و إنتهاكات كتير تانيه تقراها بشكل
أكبر - مع وجود مقاطع فيديو - من على مدونة مايكل نبيل .. من هنا
و بالمناسبة مايكل نبيل ،و هو صديق شخصي لي و صاحب المدونة اللي في اللينك لسة واصل لي حالاً خبر إعتقاله من قبل الجيش ( اللينك من هنا ) ،بسبب ما نشره على مدونته !! .. هي الأيام الوسخة دي ما خلصتش ؟؟ و مع أنك ممكن ما تتفقش معاه في الآراء بتاعته إلا أن حرية التعبير دي حق أصيل من حقوق البني آدمين و هدف من أهداف الثورة 

و بما أن الجيش بيقفش اليومين دول في بتوع المدونات اللي بيقولوا كلام مش على هواه  .. أحب أهنيه أنه حصل مني - و بجدارة - على لقب : حضرة الظابط بطة   

--------------- 

 (طفي النور يا بهية .. كل العسكر حرامية  ( محمد منير

-------