صحيت الصبح جعان ، فتحت التليفزيون على قناة الأخبار .. وقفت قدامه مُزبهل شوية بهرش في شعر صدري اللي طالع من الفانلة الحمالات و انا بفكر أفطر أيه النهاردة و بعدين أخدت حتتين كلام بايتين قلت ألحقهم قبل ما صلاحيتهم تنتهي و ريحتهم تضرب ، أخدت صفحة جرنال و سخنتها في الفرن ، إتلسوعت و انا بطلعها و بعدين فردت عليها كلام التليفزيون و صبيت شوية كلام صابح من الراديو في كوباية مش مغسولة كويس علشان أبلع بيهم .. و فطرت فطار الأبطال
قررت أنزل من البيت من غير ما أربط رباط جزمتي ، الرباط طويل و بيحتاج مني أني أربطه فيونكة و بعدين آخد ودان الفيونكة أربطها عقدة علشان ما اتكعبلش بس النهاردة مكانش عندي نفس
في الأسانسير قابلت جاري .. شاور على جزمتي و قال : رباط جزمتك مفكوك . قلتله : عارف
عند الدور الرابع و إحنا نازلين ركب الأسانسير معانا بواب العمارة و قعد يحكي لجاري عن مغامراته في السرير مع الولية مراته ، البواب عارف أن جاري عنده مشاكل جنسية لأن هو اللي بيجيبله الوصفات البلدي من العطار علشان كده كل ما يشوفه يعذبه بفتوحاته الجنسية - المشكوك في صحتها - مع الولية مراته
في أسانسير الشغل قابلت زميلي ، شاور على جزمتي و قال :رباط جزمتك مفكوك . قلتله : عارف
في الدور التاني و إحنا طالعين ركبت معانا واحدة حلوة قوي ... قلنالها صباح الخير ما ردتش
في الدور الرابع خرج زميلي من الأسانسير .. جيت أخرج معاه معرفتش ، كانت فردة رباط جزمتي مزنوقة تحت كعب جزمتها ..بصلي زميلي بأستغراب و قال : مش جاي معايا المكتب ؟
قلتله : لا
في الدور السابع خرجت البنت الحلوة من الأسانسير . طلعت وراها ، بصتلي بحدة و قالت : حضرتك في الدور الغلط
قلتلها : عارف
و هي بتتصل بالسيكيوريتي سرحت في تقاطيع وشها و إكتشفت أن عمري ما بوست حد في بقه الفرينش كيس .. صحيح لازم تلف لسانك على لسانها زي رباط الجزمة ؟ .مكنتش أعرف لكني قررت ساعتها أني لازم أسأل بواب عمارتي
ennio morricone - Il Mio Nome E' Nessuno - Mucchio Selvaggio
